По цели 22 години од албумот Box, Last Expedition се враќаат со нов сингл. Песната Hey Ho, авторски ја потпишува Енко, аранжманот е на бендот, а истата е снимена во студиото Тралала на Мите Димовски.

За оваа прилика, Last Expedition се појавуваат во освежен состав, во кој се: Енко (вокал), Сецко (гитара), Салпе (гитара), Драган Стојковски (бас) и Сашко Костов (бубањ).

Во студиската сесија, басот го сними Славчо Пеев.

Новиот сингл на Последната експедиција е вистинско освежување на домашната, веќе повеќе години анемична музичка сцена. Модерна, како за новото време, а повторно се работи за оној стар, добар Expedition, каков што некогаш во 90-те, го знаевме. Нешто како враќање… Во иднината.

Експлозивниот видео-спот беше снимен во студиото Prolight. Во неговата реализација учествуваа Горан Наумовски, како камерман, и Дарко Антоновски, кој потпишува режија и монтажа.

Last Expedition, еден од најголемите македонски алтернативни рок состави, е оформен во 1986 година во скопската населба Ѓорче Петров.

До сега имаат реализирано три студиски и еден албум снимен во живо: Intro (1993), Изгубени ликови (1994), Box (1997) и Live – A1TV Exic (2001).

Како најголемите хитови на Last Expedition се: Песната за песот, Далеку си, Ќељав дабар, Шефе, баладата Не е важно…